PIWA

1.Stack op N°2 an der Bouneweger Strooss, um Eck vun der aler Avenue (beim Schwall)

Wat heescht eigentlech PIWA? Ma dat sin déi éischt Buschtawen vu Pierre Wagner, an dat as de Numm vun deem Mann,deen d'Firma 1949 gegrënnt huet.

De Wagnesch Pier war selwer Dirigent vun enger Parti Museken an huet e Geschäft opgemaach, fir Instrumenter a Nouten fir Harmonie a Fanfare ze verkafen. Dat war um 1.Stack op N°2 an der Bouneweger Strooss, um Eck vun der aler Avenue (beim Schwall).

Mëtt der 60-er Joren huet d'Famill Wagner e Puer Ecke méi wäit e Wunn- a Geschäftshaus gebaut, an de Betrib as op N° 19 rue des Trévires geplënnert. Enn 1968 as de Wagnesch Pier ganz onerwaart gestuerwen an et huet stënterlech missen eng Léisung font gin fir de Betrib virunzeféieren. D'Madame Wagner huet an hirer Nout den Yvon Christnach gefrot, den déi Zäit Secrétaire vun der CISPM an der UGDA war. Hien huet de Betrib kaf fir säi Jong Claude, den dunn am Alter vun nëmmen 18 Joer d'Directioun iwwerholl huet.

D'Firma as lues a lues gewuess an konnt eng éischte Kéier vergréissert gin, wéi duerch Zoufall d'Nopeschhaus ze kafe war. Och nom onerwaarten Doud vum Yvon Christnach 1982 as de Betrib bis haut an den Hänn vun der Famill bliwwen. Mee Ufank den 80-er Joeren gouf et awer och kloer, datt nach eng Kéier misst vergréissert gin. Mir hun et gemaach wéi onse Viirgänger an 3 Stroosse méi wäit e Wunn- a Geschäftshaus gebaut. 1985 konnte mer an onst neit Gebei an der rue Blochausen plënneren.

WOLF

7-8, rue Clairefontaine (Schoulbierg)

1991 war e weidere wichtegen Datum: mir hun d'Musikhaus Wolf iwwerholl. D'Madame Rouff wollt a Pensioun goen an hat kee Nofolger. Wéinst der laanger Traditioun vum Haus Wolf, dat quasi bei den Inventaire vun der Stat gehéiert huet, wollte mer de Numm net verluer goe loossen. D'Firma war 1911 vum Grousspapp vun der Madame Rouff, dem Paul Wolf gegrënnt gin.

Hie war Geiebauer an huet a sengem Geschäft Instrumenter a Noute verkaf.

Jiddereen den nach am ale "Quatsch" war, erënnert sech nach, wéi en iwwer de knubbelege Pawee an de Schoulbierg säin "imposé" bestelle gaang as. Mee d'Stat an d'Leit hu sech verännert, de "Quatsch" as op Märel geplënnert, de "Wollef" krut de Bail net méi verlängert an huet missen op de Knuedler bei de Fiische plënneren. Domat war "déi gutt, al Zäit" eriwwer. Et as ëmmer méi kloer gin, datt Musek Wolf op däer Plaz a mat däer Struktur keng Zukunft hätt.

Wéi d'Geléenheet koum fir d'Nopeschhaus vum Piwa ze kafen, war d'Décisioun séier gefall. Mir konnten alles op enger Plaz, an onsen egene véier Maueren, beienee léen an ons organiséiere wéi mer wollten: 1995 as Musek Wollef niewent de Piwa op 37, rue B. geplënnert.

Editioun

Dem Yvon Christnach säin Hobby war eng kleng Editioun déi hie schon an de 60-er Joeren als UGDA- Sekretär op d'Bee gesat hat. Et guewen eng Parti Stécker esouguer vu renomméierten auslännesche Komponisten gedréckt, déi haaptsächlech fir d'Concour'en geduecht waren. Doniewent war och ëmmer den Eiergäiz do fir de Lëtzebuerger Komponisten eng Méiglechkeet ze schafen fir hir Wierker drécken ze loossen, well déizäit hun esou guer déi dichtegst vun hinnen nach misse Sue matbréngen fir an enger auslännescher Editioun ënnerzekommen. Datt esou eng Editioun zu Lëtzebuerg nëmme kënnt en deieren Hobby fir Gecke sin, war gewosst. Et kann ee sech haut scho bal net méi viirstellen, wéi nach virun 10 Joer an den Editioune geschafft gouf, iert d'Revolutioun duerch d'Informatik esou vill nei Méiglechkeete bruecht huet.

Mir féieren haut de Stock nach virun, fir datt déi vill Aarbecht net ganz fir näischt war an editéieren och nach eenzel Saachen, déi et nëmmen handgeschriwwe gi sin a soss verluer géngen oder déi vu rengem Letzebuerger Intressi sin, wéi d'Solfège - Bicher vum J.P. Frisch a Bëpp Winandy.

Aus demselwechte Grond hat de Claude Christnach fir d'Joer vun Letzebuerger Musek 1989 e sëlleche Recherche gemaach an e Katalog zesummegestallt vun alle Stécker vu Lëtzebuerger Komponisten, déi ze fanne waren - op gedréckt oder geschriwwen. Den Ausgangspunkt waren d'Wierker fir Harmonie/Fanfare, déi op denen onméiglechste Plazen vertesselt oder vergiess waren. Vun dene Komponisten, déi nach liewen, hu mer natierlech och d'Wierker fir aner Besetzunge mat opgeholl.

Mir hu wëlles, mat däer Aarbécht virunzefueren, oder besser gesot, erëm unzefänken an de Katalog um Internet aktuell ze halen. Méi doriwwer op der Säit " Piwa Musekseditioun " .